काठमाडौं, भाद्र २२ । नेपाली कांग्रेसले सरकारद्वारा सामाजिक सञ्जाल निष्क्रिय पारिएको निर्णयप्रति असन्तुष्टि जनाउँदै यसबारे छलफल गर्ने निर्णय गरेको छ।
आइतबार पार्टी सभापति शेरबहादुर देउवा निवास बुढानिलकण्ठमा बसेको कांग्रेस कार्यसम्पादन समितिको बैठकमा नेताहरूले उक्त निर्णयबारे गम्भीर आपत्ति जनाएपछि छलफल गर्ने निर्णय भएको सहमहामन्त्री डिना उपाध्यायले जानकारी दिइन्।
उनका अनुसार सामाजिक सञ्जाललाई नियमन आवश्यक भए पनि बन्द गर्ने कदम जनताको हक अधिकार विपरीत रहेको भन्दै कांग्रेसले आपत्ति जनाएको हो। “नियमन गर्न सकिन्छ, तर बन्द नै गर्नु उचित होइन,” उपाध्यायको भनाइ छ।
बैठकले मनाङ क्षेत्र नं. १ (प्रदेशसभा क्षेत्र नं. २) को उपनिर्वाचनका लागि दल दर्ता गर्ने निर्णय समेत गरेको छ।
त्यस्तै, कांग्रेस नेता अर्जुन नरसिंह केसीले सामाजिक सञ्जाल निष्क्रिय पारिएपछि आमनागरिकमा असन्तुष्टि बढेको भन्दै यसबारे सरकारसँग गम्भीर वार्ता गरिने बताए। “सरकारको गलत कदममा कांग्रेसले हस्तक्षेप गर्नुपर्छ,” उनले भने।
नेता केसीले संवैधानिक परिषद्सम्बन्धी विधेयक बिना छलफल संसद्मा प्रस्तुत हुनु पनि अनुचित भएको टिप्पणी गरे।
सम्बन्धित खवर
