काठमाडौं, भदौ २६ । जेन जीद्वारा आह्वान गरिएको भ्रष्टाचार विरोधी आन्दोलन सफल भएपछि मुलुकमा उत्पन्न राजनीतिक रिक्तताको अवस्थाबारे मानव अधिकार तथा शान्ति समाजले गम्भीर ध्यानाकर्षण गराउँदै अन्तरिम सरकार शीघ्र गठन गर्न आग्रह गरेको छ।
शान्ति समाजका सभापति रेनुका पौडेलद्वारा हस्ताक्षरित विज्ञप्तिमा भदौ २३ गतेको आन्दोलनका क्रममा भ्रष्टाचारविरुद्ध सडकमा उत्रिएका १९ जनाको प्रहरी गोलीबाट मृत्यु भएको घटनाप्रति पुनः दुःख व्यक्त गरिएको छ। उक्त घटनाले मुलुकभर आक्रोश र कम्पन पैदा गरेको उल्लेख गर्दै समाजले सार्वजनिक तथा निजी सम्पत्तिमा भएको तोडफोड, आगजनी र प्रेस संस्थामाथि भएका आक्रमणलाई भने दुर्भाग्यपूर्ण बताउँदै निन्दा गरेको छ।
विज्ञप्तिमा आन्दोलनपछि सरकार र प्रशासन निष्क्रिय अवस्थामा रहेको, प्रहरी पूर्णरूपमा कार्यक्षेत्रमा फर्कन नसकेको र कानुनविहीनताको स्थिति सिर्जना भएको उल्लेख छ। यस्तो अवस्थामा नेपाली सेनाले गरेको सार्थक पहल उल्लेखनीय भए पनि रिक्तता दीर्घकालीन रूपमा घातक हुने चेतावनी दिँदै अन्तरिम सरकार चाँडै गठन हुने अपेक्षा समाजले व्यक्त गरेको छ।
भ्रष्टाचारविरोधी आन्दोलनको मूल भावना भ्रष्टाचारको अन्त्य र नागरिक स्वतन्त्रताको संरक्षण रहेको समाजले स्पष्ट पारेको छ। विभिन्न दलका शीर्ष नेताहरूलाई कानूनी प्रक्रियामार्फत कारबाही गर्नुपर्ने र नागरिक स्वतन्त्रता, लोकतान्त्रिक गणतन्त्र र सर्वोच्चतामाथि कुठाराघात गर्ने कुनै पनि प्रयास अस्वीकार्य हुने विज्ञप्तिमा उल्लेख छ। अन्तरिम सरकारको मूल दायित्व नागरिक तथा सार्वजनिक सम्पत्तिको सुरक्षा, कानुन र व्यवस्थाको पुनःस्थापना, अहिंसा र सहिष्णुताको प्रवर्द्धन तथा स्वतन्त्र र भयरहित वातावरणमा निर्वाचन सम्पन्न गर्नु पर्नेमा समाजले जोड दिएको छ।
संविधान लागू भएको एक दशक पूरा भएको सन्दर्भमा शान्ति समाजले संविधान संसोधन निरन्तर चलिरहने प्रक्रिया भएको स्मरण गराउँदै यसको जिम्मेवारी आगामी निर्वाचनपछि गठन हुने संसद्को हुने स्पष्ट पारेको छ। संविधान संसोधनको बहसलाई सार्थक ढंगले अघि बढाउने दायित्व अब जेन जी पुस्ताको काँधमा आएको समाजले जनाएको छ।
सम्बन्धित खवर
