काठमाडौँ, भाद्र ३१ । जेनजी आन्दोलनको नेतृत्व गरिरहेका सुदन गुरुङले सञ्चालन गर्दै आएको ‘हामी नेपाल’ संस्थाले सोमबार तीन बुँदे दृष्टिकोण सार्वजनिक गर्दै देशको वर्तमान परिस्थितिप्रति कठोर प्रतिक्रिया दिएको छ।
संस्थाले जारी गरेको दृष्टिकोणमा राष्ट्र निर्माणमा युवाको अपरिहार्य भूमिका, शान्तिपूर्ण अभिव्यक्ति र लोकतान्त्रिक आन्दोलनको महत्व, तथा विपत्ति र सङ्कटका घडीमा एकताको अपरिहार्यता जोडिएको छ।
विज्ञप्तिमा हाल देखिएका आगजनी, सम्पत्ति ध्वंस, विश्वासघाती हस्तक्षेप र जनधनको क्षतिलाई केवल निन्दनीय मात्र नभई मानवता र सभ्य समाजमाथिको आक्रमणको संज्ञा दिइएको छ। यसले सामाजिक सद्भाव, शान्ति र एकतालाई अपूरणीय क्षति पुर्याएको भन्दै संस्थाले गहिरो दुःख प्रकट गरेको छ।
संस्थाले प्रतिहिंसात्मक व्यवहार र ध्वंसकारी गतिविधिलाई छाड्दै संवाद, सहकार्य र सहानुभूतिपूर्ण ढङ्गले मात्र मुलुकलाई नयाँ बाटोतर्फ डोर्याउन सकिने स्पष्ट चेतावनी दिएको छ। साथै, व्यक्तिगत आग्रह–पूर्वाग्रह त्यागी समग्र नेपाल र नेपालीको बृहत्तर हितमा योगदान गर्न सबैलाई आह्वान गरेको छ।
सम्बन्धित खवर
