काठमाडौँ, भाद्र ३१। भदौ २३ र २४ गतेको जेनजी आन्दोलनपछि बनेको सुशीला कार्की नेतृत्वको अन्तरिम सरकारले फागुन २१ गतेका लागि घोषणा गरेको प्रतिनिधिसभा निर्वाचनप्रति प्रायः सबै प्रमुख दलहरू सकारात्मक देखिएका छन्।

शुरुवातमा केही दलहरूले असहमति जनाए पनि पछिल्लो समय नेपाली कांग्रेस, नेकपा एमाले, नेकपा माओवादी केन्द्रलगायत दलहरूले तोकिएको समयमा निर्वाचन सुनिश्चित गर्नुपर्ने धारणा सार्वजनिक गरेका छन्।

नेपाली कांग्रेसका महामन्त्री गगन थापाले सोमबार धारणा सार्वजनिक गर्दै भने, “अन्तरिम सरकार गठन भइसकेको छ, निर्वाचनको मिति घोषणा भइसकेको छ। जिम्मेवार लोकतान्त्रिक पार्टीको हैसियतले तोकिएको समयमा निर्वाचन सुनिश्चित गराऔँ र आवश्यक सहयोग गरौँ।”

त्यस्तै नेकपा एमालेका महासचिव शंकर पोखरेलले पार्टी कार्यालय अनुगमनपछि दिएको भनाइमा अन्तरिम सरकारको प्रमुख दायित्व तोकिएको समयमा निर्वाचन सम्पन्न गर्नु हो भन्दै एमाले त्यसका लागि सहयोग गर्न तयार रहेको स्पष्ट पारे।

नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठले पनि घोषित मितिमा निर्वाचन गर्न सबै दल एकजुट हुनुपर्नेमा जोड दिएका छन्। राष्ट्रिय स्वतन्त्र पार्टी (रास्वपा)ले समेत समयमै ताजा जनादेश लिनुपर्नेमा जोड दिएको छ। प्रवक्ता मनिष झाले लोकतान्त्रिक अभ्यासलाई अगाडि बढाउन निर्वाचन अपरिहार्य भएको बताए। जसपा, नेकपा एकीकृत समाजवादीलगायत दलका नेताहरूले पनि पछिल्ला अभिव्यक्तिमा स्वतन्त्र, निष्पक्ष र भयरहित निर्वाचनको पक्षमा समर्थन जनाएका छन्।

यद्यपि प्रमुख दलहरूले चुनावप्रतिको धारणा सार्वजनिक गरे पनि औपचारिक निर्णय भने पार्टीको आधिकारिक बैठकमार्फत गर्ने बाँकी छ। यसैगरी २०८२ साल फागुन २१ गते हुने प्रतिनिधिसभा निर्वाचनलाई नेपाली राजनीतिमा नयाँ मोडका रूपमा लिइएको छ, जसले आगामी सत्ता समीकरण र देशको लोकतान्त्रिक अभ्यासलाई निर्णायक मोडमा पुर्‍याउने अपेक्षा गरिएको छ।