गैंडाकोट, ४ कार्तिक । विश्वभर विभिन्न कार्यक्रमका साथ अन्तर्राष्ट्रिय बाल दिवस मनाइएझैँ नवलपुरमा पनि आज विविध सन्देशमूलक गतिविधिसहित दिवस मनाइएको छ। मानव अधिकार तथा शान्ति समाज नवलपुरले गैँडाकोट-२ मा बालअधिकारसम्बन्धी विभिन्न नारा अंकित व्यानर प्रदर्शनी गरी दिवसलाई विशेष रूपमा मनाएको हो।

कार्यक्रम मानव अधिकार तथा शान्ति समाज नवलपुरका सभापति कमल शर्माको अध्यक्षतामा भएको थियो। कार्यक्रममा पूर्व केन्द्रिय सचिव श्यामसुन्दर पराजुली, पूर्व जिल्ला अध्यक्ष माधवप्रसाद गौतम, जिल्ला कार्यसमितिका पदाधिकारी, बालअधिकारकर्मी तथा बालबालिकाको उल्लेख्य उपस्थिति रहेको थियो।

सभापति शर्माले बालअधिकार संरक्षण केवल सामाजिक जिम्मेवारी मात्र नभई राष्ट्र निर्माणको पूर्वशर्त भएको बताउँदै भने,

“हामीले बालबालिकालाई सुरक्षित, सम्मानित र अवसरयुक्त वातावरण दिन सकेनौँ भने विकासका हरेक योजना अपुरै रहन्छन्। बालअधिकारलाई व्यवहारमा उतार्न घर-परिवारदेखि समुदाय र राज्य सबै तहले समान प्रतिबद्धता जनाउनुपर्छ,” भन्नेमा उनले जोड दिए। उनले बालमजदुरी, दुव्र्यवहार, हिंसा र शोषणमुक्त समाज निर्माणका लागि निरन्तर सहकार्य आवश्यक रहेको बताए।

सन् १९८९ नोभेम्बर २० मा संयुक्त राष्ट्रसंघको महासभाबाट बालअधिकारसम्बन्धी महासन्धि अनुमोदन भएको दिनको स्मरणमा हरेक वर्ष नोभेम्बर २० का दिन विश्वभर अन्तर्राष्ट्रिय बाल दिवस मनाइँदै आएको छ। संयुक्त राष्ट्रसंघको आह्वानमा मनाइने यस दिवसले बालबालिकाको अधिकार, सुरक्षा, शिक्षा तथा समग्र विकासलाई प्राथमिकतामा राख्न सदस्य राष्ट्रलाई निरन्तर सचेत गराइरहेको छ।

नवलपुरमा मनाइएको आजको कार्यक्रमले बालअधिकारप्रति समाजको संवेदनशीलता, संस्थागत प्रतिबद्धता र भावी पुस्ताप्रतिको उत्तरदायित्व झनै प्रस्ट बनाएको छ।