गैंडाकोट, मङ्सिर ६ । नवलपुरको गैंडाकोटस्थित मौलाकाली केवलकार दुई महिनापछि पुनः सञ्चालनमा आउने भएको छ। भाद्र २५ गतेदेखि बन्द रहेको सेवा आउँदो शनिबारदेखि सुचारु हुने स्टेशन म्यानेजर सुरज पौडेलले जानकारी दिए।

भाद्र २४ गतेको तोडफोड र आगजनीका कारण बटम स्टेशनमा रहेका कार्यालय भवन, फर्निचर तथा प्राविधिक उपकरण क्षतिग्रस्त भएपछि केवलकार सेवा रोकिएको थियो। क्षतिग्रस्त संरचना र उपकरणको पुनर्निर्माणका लागि अष्ट्रियाली निर्माता कम्पनी ‘डोपलमायर’ का प्राविधिक तथा इन्जिनियरहरूको टोलीले व्यापक मर्मत तथा परीक्षण कार्य सम्पन्न गरेको पौडेलले बताए।

“केवलकार चलेको एक हप्तासम्म हामीले सूक्ष्म रूपमा सबै सुरक्षा जाँचहरू गर्यौं। सबै पक्ष सुरक्षित र विश्वसनीय भएपछि मात्र सर्वसाधारणका लागि खुला गर्ने निर्णय गरेका हौं,”उनको भनाइ छ। उनका अनुसार केवलकार अब पहिलेझैँ बिहान ६ बजेदेखि राति १० बजेसम्म सञ्चालन हुनेछ।

केवलकारको सेवा अवरुद्ध हुँदा माथिल्लो स्टेशनमा अवस्थित इला रिसोर्टको आगन्तुक संख्या पनि उल्लेख्य रूपमा घटेको थियो। “होटल खुला भए पनि केवलकार नचलेपछि सेवाग्राही निकै नै कम आउनुभयो,” इला रिसोर्ट तथा मौलाकाली केवलकारका महाप्रबन्धक अरबिन्द्र केसीले बताए। अब सेवा सुचारु भएसँगै पर्यटक आगमन बढ्ने र अझ गुणस्तरीय सेवा दिन सहज हुने उनको विश्वास छ।

केवलकार बन्द हुँदा मौलाकालिका मन्दिरमा आउने भक्तजनको भीडसमेत घटेको धार्मिक सेवा समिति मौलाकालिका मन्दिरका अध्यक्ष शालिकराम सापकोटाले बताए। “दशैं–तिहार जस्तो ठूलो सिजनमा पनि भक्तजन धेरै आएनन्। भेटीसमेत अघिल्ला वर्षको तुलनामा निकै कम चढ्यो,”सापकोटाले भने। उनले केवलकार सञ्चालनमा आएसँगै भक्तजनको आगमन फेरि ३० प्रतिशतभन्दा बढीले बढ्ने अपेक्षा व्यक्त गरे।

२०८० वैशाखदेखि सञ्चालनमा आएको मौलाकाली केवलकारमार्फत अहिलेसम्म करिब ६ लाखले सेवा लिइसकेको तथ्यांक छ। केवलकार सञ्चालनले मौलाकालिका क्षेत्रको पर्यटन प्रवर्धनसँगै स्थानीय मन्दिर, होटल, सामाजिक संस्थादेखि सरकारी संरचनासम्म आर्थिक लाभ पुर्‍याउँदै आएको छ।