गैडाकोट, मङ्सिर १२ । गैडाकोट नगर प्याब्सनको आयोजनामा तथा गैडाकोट खेलकुद समितिको व्यवस्थापनमा “गैडाकोट नगरस्तरीय प्याब्सन कप विद्यालयस्तरीय फुटबल प्रतियोगिता-२०८२” बिहिबारदेखि गैडाकोट क्षेत्रीय रङ्गशालामा सुरु भएको छ।
नगर प्याब्सन अध्यक्ष भरत बाबु कडेलको संयोजकत्वमा सुरु गरिएको प्रतियोगिताको उद्घाटन नगर शिक्षा अधिकृत रामप्रसाद अधिकारीले गरेका हुन्। उद्घाटन समारोहमा विशेष अतिथि नवलपुर जिल्ला फुटबल सङ्घका महासचिव तथा गैडाकोट खेलकुद विकास समितिका अध्यक्ष लक्ष्मण कार्की, साथै प्रकाश पौडेल, डिलकुमारी घिमिरे, रोसन दर्लामीलगायतको उपस्थिति रहेको थियो। कार्यक्रममा सर्वसाधारण, शिक्षक-शिक्षिका, खेलप्रेमी, पत्रकार तथा विद्यार्थीहरूको उल्लेख्य सहभागिता रहेको थियो ।
कार्यक्रमका संयोजक तथा नगर प्याब्सन अध्यक्ष भरत बाबु कडेलले सोही अवसरमा बोल्दै“विद्यार्थीले खेलकुदमार्फत अनुशासन, सहकार्य र नेतृत्वको गुण सिकून् भन्ने उद्देश्यले हामीले यो प्रतियोगिता आयोजना गरेका हौँ। विद्यालयस्तरमै खेलको आधार बलियो बनाउन आवश्यक छ।”
कार्यक्रमको उद्घाटन गर्दै प्रमुख अतिथि नगर शिक्षा अधिकृत रामप्रसाद अधिकारीले आफ्नो मन्तव्यमा “विद्यालयस्तरमा यस्ता प्रतियोगिताले विद्यार्थीको आत्मविश्वास अभिवृद्धि गर्नुका साथै प्रतिभावान खेलाडी पहिचान गर्न ठूलो मद्दत गर्छ। शिक्षा र खेलकुद एक-अर्काका परिपूरक हुन्।”
त्यसैगरी गैडाकोट खेलकुद विकास समितिका अध्यक्ष तथा विशेष अतिथि लक्ष्मण कार्कीले भने “स्थानीय तहबाटै खेल संरचना मजबुत भए मात्र राष्ट्रिय स्तरसम्म खेलाडी पुर्याउन सम्भव हुन्छ। गैडाकोटमा खेलकुदको वातावरण विस्तार गर्न यस्ता कार्यक्रमहरू अत्यन्त महत्वपूर्ण छन्।”
प्रतियोगितामा नगरका १४ विद्यालय सहभागी छन्। नगर प्याब्सनका अनुसार विद्यालयस्तरीय प्रतिस्पर्धाबाट छनोट भएका उत्कृष्ट खेलाडीहरूलाई आगामी दिनमा जिल्लास्तरीय प्रतियोगितामा समावेश गराइनेछ।
बिहिबारको उद्घाटन खेलमा विजय सामुदायिक शिक्षा सदनले कन्टिनेन्टल बोर्डिङ स्कुललाई ०-६ गोलले पराजित गर्दै प्रतियोगितामा विजयी सुरुवात गरेको छ। साथै उद्घाटन खेलसँगै अन्य प्रतिस्पर्धी टिमहरूलाई समेत सोही दिन समावेश गराइएको थियो।
