गैंडाकोट, मङ्सिर १ । भदौ २४ गते प्रदर्शनकारीद्वारा गरिएको आगजनीपछि बन्द भएको गैंडाकोटस्थित मौलाकाली केबलकार करिब दुई महिनापछि पुनः सञ्चालनमा आएको छ। अस्ट्रियाबाट आएका इन्जिनियरको मर्मत तथा पुनर्निर्माणपछिको परीक्षण सोमबारबाट सुरु भएको र केही दिन लगत्तै व्यवसायिक सेवा सञ्चालनमा आउने स्टेसन म्यानेजर सुरज पौडेलले बताए।
पौडेलका अनुसार आगजनीका कारण पूर्णरूपमा क्षतिग्रस्त भएको बटम स्टेसन पुनर्निर्माणपछि अब भक्तजन तथा पर्यटकहरूका लागि सेवा सहज बनेको छ। मौलाकाली मन्दिर दर्शन तथा आसपासका धार्मिक-पर्यटकीय गन्तव्य पुग्न यस केबलकारले महत्वपूर्ण भूमिका खेल्ने बताइएको छ।
केबलकारमा रहेका १२ वटा डब्बामार्फत एकपटकमा ९६ यात्रुले ओहोरदोहोर गर्न सक्छन्। १,२०० मिटर लम्बाइको यो केबलकारमार्ग पार गर्न करिब ५ मिनेट लाग्ने जानकारी दिइएको छ। साढे दुई वर्षको अवधिमा करिब ६ लाखभन्दा बढी दर्शनार्थीले यस केबलकार सेवा प्रयोग गरेको स्टेसनले जनाएको छ।
मौलाकाली केबलकारको माथिल्लो स्टेसनबाट देवघाट, चितवन र नवलपरासीका मनोरम दृश्य अवलोकन गर्न सकिने भएकाले यहाँ दैनिक ५ सयदेखि १० हजारसम्म दर्शनार्थी आउने गरेको तथ्याङ्क छ।
सम्बन्धित खवर
