गैडाकोट, मंसिर २२ । जिल्लाको गैडाकोट नगरपालिका-५ कुसुमघाटस्थित अधिकारी कुल मन्दिर नजिक नारायणी नदीमा एक युवक डुबेर बेपत्ता भएका छन्।

सोमबार साँझ १७:०० बजेतिर राईनो वाटर इन्टरटेनमेन्ट प्रा.लि.ले निर्माण गर्दै आएको क्रुज (पानी जहाज) मा कार्यरत जिल्ला बैतडी, दशनथचन्द नगरपालिका-९ नागारजुन बर्तौली घर भएका वर्ष २०/२१ का तरुण भण्डारीले नदीमा हाम फालेपछि बेपत्ता भएको प्रहरीले जनाएको छ।

भण्डारीले नदीमा हाम फाल्नुअघि सोही क्रुजमा रहेका जिल्ला चितवन, भरतपुर महानगरपालिका-४ शिवघाट बस्ने ४५ वर्षीय शिव भट्टराईलाई आफ्नो मोबाइल दिई भिडियो बनाउन अनुरोध गरेका थिए । घटनाबारे जानकारी प्राप्त हुनासाथ प्रहरी टोली घटनास्थल पुगेर खोज तथा उद्धार कार्य अघि बढाएको जिल्ला प्रहरी कार्यालयले जनाएको छ। खोजतलास कार्य जारी रहेको प्रहरीले जनाएको छ।