काठमाडौं, भदौ ३१ । नेकपा एमालेका पोलिटब्युरो सदस्य महेश बस्नेतले मंगलबार राजधानीमा छिट्टै ठूलो राजनीतिक चुनौती पेश गर्ने चेतावनी दिए। जेनजी आन्दोलनपछि पारीलिएको तापक्रमका बीच बस्नेतले एक/दुई दिन भित्रै काठमाडौंमा १० हजार युवाको जुलुस गर्ने स्पष्ट घोषणा गरे, जसले राजधानीको राजनीतिक वातावरण अहिले नै तातिएजस्तो भएको छ।
युवा संघले पार्टीको जलेको कार्यालयमा आयोजना गरेको कार्यक्रममा बोल्दै बस्नेतले भने, “भोलि या पर्सीमा हामी काठमाडौंमा १० हजार युवाको जुलुस गर्छौं, के हो एमाले देखाउँछौं।” उनले एमालेले आफ्नो पहिचान फिर्ता ल्याइसकेको दाबी गर्दै “हामी अब पुरानो अवस्थामा फर्कियौं” भनी जोड दिए। बूढो गठबन्धनभन्दा पनि सक्रिय युवाशक्ति मार्फत पार्टीलाई पुनर्स्थापित गर्ने अवस्थामा रहेको उनको तर्क थियो।
बस्नेतले एमालेको लामो समयदेखिको अभियानको नयाँ संकेतसमेत दिए “मिसन ०८४” २ वर्षअघि सरेको भन्दै उनले अब चुनाव तयारीमा भएको घोषणा गर्दै भने, “अब ०८२ मा लाग्यौं… अब हामीले बहुमत ल्याउँछौं।” यो भनाइले एमालेभित्रको रणनीतिक परिवर्तन र चुनावी आत्मविश्वास स्पष्ट देखिन्छ।
कार्यक्रमका क्रममा युवा संघका अध्यक्ष क्षितिज थेबेले पनि आक्रामक सुरमा बोले। उनले जेनजीको नाममा विध्वंस र षडयन्त्र गरेको आरोप लागेको पक्षको कारबाही माग गर्दै भने, “जेनजीको नाममा गरिएका षडयन्त्रको पर्दाफास गर्नुपर्छ। अहिले चुनावी अन्तरिम सरकार बनेको छ। समयमै चुनाव हुनुपर्छ। संविधानलाई अपव्याख्या गरेर देशलाई राजनीतिक अस्थिरतामा लैजाने कामको खबरदारी गर्नेछौं।”
यस घोषणापछि राजधानी र राजनीतिक दलहरूमै विशेष सर्त पैदा भएको छ । के एमालेले साँच्चिकै भनिए जस्तै सङ्ख्यामा आधारित प्रदर्शनमार्फत तरंग फैलाउनेछ? या यसले देशभरि नयाँ ध्रुवीकरण र प्रतिस्पर्धालाई जन्म दिनेछ? आगामी २४-४८ घण्टामा काठमाडौंको सडक र राजनीतिक मञ्चमा हुने घटनाक्रमले नै दिशानिर्देश तय गर्नेछ।
सम्बन्धित खवर
