गैंडाकोट, कार्तिक २६। जिल्ला प्रहरी कार्यालय नवलपरासी (बर्दघाट सुस्ता पूर्व) ले गैँडाकोटबाट लागुऔषधसहित चार जनालाई नियन्त्रणमा लिएको छ।

गोप्य सूचनाको आधारमा खटिएको प्रहरी टोलीले गत कात्तिक २४ गते साँझ साढे ५ बजे गैँडाकोट नगरपालिका-५, कुसुमघाटस्थित नारायणी नदी किनारबाट उनीहरूलाई पक्राउ गरेको हो। पक्राउ पर्नेमा गैँडाकोट-५ का २५ वर्षीय राजु कुमाल, गैँडाकोट-१ का २४ वर्षीय शिव विक, सोही स्थानका २४ वर्षीय सुजल परियार र २६ वर्षीय पुजन परियार रहेका छन्।

प्रहरीका अनुसार खानतलासीका क्रममा राजु कुमालको साथबाट ‘Anargan-25’ लेखिएको ९२ वटा र ‘Tramol-50’ लेखिएको ९२ वटा क्याप्सुल फेला परेको थियो। यसैगरी, पक्राउ परेका शिव विकको कोठामा खानतलासी गर्दा भान्सा कोठामा लुकाइछिपाइ राखेको अवस्थामा १ किलो ५६५ ग्राम गाँजा समेत बरामद गरिएको छ।