गैंडाकोट १९ चैत । लियो क्लव अफ गैंडाकोट मौलाकालिकाको १०औं वार्षिकोत्सव कार्यक्रम विहिवार गैंडाकोटमा सम्पन्न भएको छ । क्लवका अध्यक्ष कविर गौतमको अध्यक्षतामा भएको १०औं वार्षिकोत्सव कार्यक्रममा लियो क्लव जिल्ला परिषद ३२५ बि टू का अध्यक्ष कुवेरकान्ति पाठक प्रमुख अतिथि रहनु भएको थियो ।
वार्षिकोत्सव कार्यक्रमलाई सम्वोधन गर्दै प्रमुख अतिथि पाठकले क्लवले १० वर्षको निरन्तर यात्रा गरिरहँदा आज ४,०१७ दिन पुगेको र स्थापना देखिका प्रत्येक दिनहरु क्लवले आफुलाई समाजसेवामा व्यस्त बनाएको बताउनुभयो । वहाँले क्लवको स्थापना पछि यसका सदस्यहरु समाजमा खाना खुवाउनेदेखि सडक, सदन र सरकारसम्ममा भएको प्रतिनिधित्वले इमान्दार र लगनशिलसहित निरन्तर समाजसेवामा हामी कति व्यस्त छौं भन्ने कुराको प्रमाणित भएको बताउनुभयो ।
सन् २०११ मा स्थापना भएको लियो क्लब अफ गैंडाकोट मौलाकालिकाले समुदायमा शिक्षा, स्वास्थ्य, खेलकुद तथा प्राकृतिक विपत्ति आदिका क्षेत्रमा उल्लेखनीय योगदान पुर्याउँदै आएको छ ।
कार्यक्रममा आफ्ना भनाईहरु राख्दै क्लबका अध्यक्ष कबिर गौतमले आफ्नो कार्यकालमा समाजसेवामा योगदान दिने क्लबका सदस्यहरूको कदर गरिएको र आगामी दिनहरुमा पनि सामाजिक सेवामा समर्पित क्लबका सदस्यहरूको उच्च मूल्याङ्कन गरी कदर तथा सम्मान गरिने जानकारी दिनुभयो । यसैगरी अध्यक्ष गौतमले आगामी दिनहरुमा समाजमा देखिएका सामाजिक समस्याहरूको पहिचान गरि तिनलाई सुल्झाउँदै अझ बढि सक्रियताका साथ अगाडि बढ्ने प्रतिबद्धता समेत व्यक्त गर्नुभयो ।
कार्यक्रममा शुभकामना मन्तव्य व्यक्त गर्ने अन्य वक्ताहरूमा क्लवका संस्थापक अध्यक्ष अनन्त कँडेल, पूर्वअध्यक्ष सि. आर. कँडेल, जिल्ला परिषद ३२५ बि टु का पूर्व अध्यक्ष अमित कुमार गुग्ता, लियो क्लव अफ चौतारीकी अध्यक्ष सविना लम्साल, लियो क्लव काठमाण्डौ मातृभूमिका दिवश सुवेदी, रिजन कोअर्डिनेटर कृष्ण शर्मा, लगायतका रहनुभएको थियो ।
लियो क्लव अफ गैंडाकोट मौलाकालिकाका दृतिय भाईस प्रेसिडेण्ट अर्जुन ढकालले स्वगत मन्तव्य राख्नु भएको १० औ वार्षिकोत्सव कार्यक्रमको संचालन क्लवका सचिव श्यामप्रसाद चापागाईले गर्नुभएको थियो ।
शुक्रबार, चैत २०, २०७७ प्रकाशीत
