नवलपुर, मङ्सिर १३ । गैंडाकोट नगरपालिकाको आयोजनामा नगरस्तरीय राष्ट्रपति रनिङ शिल्ड प्रतियोगिता गैंडाकोट ३ श्रीकृष्ण गण्डकी माध्यमिक विद्यालयको खेलमैदानमा बुधबारदेखि सुरु भएको छ।
प्रतियोगिताको उद्घाटन गैंडाकोट नगरपालिकाका मेयर मदन भक्त अधिकारीले उद्घाटन गरेका छन्। उद्घाटन समारोहलाई सम्बोधन गर्दै अधिकारीले शारीरिक र मानसिक स्वास्थ्यका लागि खेलकुद अपरिहार्य भएको बताउँदै नगरस्तरीय प्रतियोगिताले राष्ट्रिय स्तरका खेलाडी तयार हुनेमा आफू विश्वस्त रहेको बताए । कार्यक्रममा नगरपालिकाका प्रमुख प्रशासकीय अधिकृत झविन्द्र खनालले कार्यक्रम सफलताको शुभकामना दिदै नगरका विद्यालयहरूलाई व्यवस्थित र विद्यार्थी केन्द्रित पठानपाठनको वातावरण कसरी मिलाउन सकिन्छ भन्ने तर्फ नगरपालिका लागिरहेको बताए ।
नगरपालिकाका भित्र रहेका २९ सामुदायिक तथा संस्थागत विद्यालयका माध्यमिक स्तरका विद्यार्थीहरुले उक्त प्रतियोगितामा प्रतिस्पर्धा गर्ने श्रीकृष्ण गण्डकी माध्यमिक विद्यालयका प्राचार्य सूर्यनाथ तिवारीले जानकारी दिँदै उनले तीन दिनसम्म सञ्चालन हुने प्रतियोगितामा भलिबल, कबड्डी, दौड, कराँते, हाइजम्प लङ जम्प लगायतका खेल समावेश गरिएको उनले बताए । मङ्सिर १२ देखि १४ सम्म सञ्चालन हुने प्रतियोगितामा नगरपालिका भित्रका २९ विद्यालयका विद्यार्थीले प्रतिस्पर्धा गर्नेछन् । प्रतिस्पर्धामा प्रथम, द्वितीय र तृतीय हुने विद्यालयले रानिङ्ग शिल्ड, मेडल, ट्रफी र प्रमाणपत्रसहित नगद पुरस्कार प्राप्त गर्ने छन् ।
