नवलपरासी (बर्दघाट सुस्ता पूर्व) : गैंडाकोट नगरपालिका-१४ भागरबाट हराएका साढे दुई वर्षीय बालक शिवान तामाङ दुई दिनपछि जंगलमा सकुशल फेला परेका छन्।
गत भदौ २ गते बिहान करिब ७:०० बजे घर नजिकै रहेको शंखदेवी सामुदायिक वनमा हजुरआमा हेम कुमारी आले च्याउ टिपेर फर्किने क्रममा नाति शिवान घरबाट हराएका थिए। आफन्त र स्थानीयले वन क्षेत्रमा खोजतलास गर्दा पनि बालक फेला नपरेपछि प्रहरीमा निवेदन दिइएको थियो।
प्रहरीमा सूचना प्राप्त हुनासाथ इलाका प्रहरी कार्यालय गैंडाकोट, रजहर र अस्थायी प्रहरी पोस्ट बेल्डियाबाट खटिएको प्रहरी टोली तथा स्थानीय बासिन्दाहरूको संयुक्त टोलीले व्यापक खोजतलास सुरु गरेको थियो।
निरन्तरको खोजतलासपछि भदौ ४ गते बिहान अन्दाजी १०:०० बजे शंखदेवी सामुदायिक वनको भागर खोलाको सिरानमा बालक सकुशल अवस्थामा फेला परेका हुन्। उद्दार गरिएका बालकलाई आवश्यक प्रक्रिया पूरा गरी उनका आफन्तको जिम्मा लगाइएको प्रहरीले जनाएको छ।
सम्बन्धित खवर
